إزاي تتكلم في المحمول؟

طبعا معظم الناس دلوقتي عندها تليفون محمول...
وكل بيت بقى فيه أكتر من محمول

وفي ناس بقت معتمدة عليه بشكل غير عادي.. وما ينفعش يعيشوا من غيره
طبعا منهم ناس معتمدة اعتماد شكلي بس... لأنها ما تستغناش عن الرغي مع فلانة وعلانة وتجيب معاهم في سيرة علانة وفلانة (على الترتيب)
وناس تانية معتمدة عليه بجد.. لأنهم بقوا بيخلصوا شغلهم عليه ... وبيسهل لهم حاجات كتير في شغلهم..

لكن الحاجة اللي ناس كتير لسة ما اتعلمتهاش هي آداب استخدام المحمول والتحدث فيه

كتير مننا اتعرض لموقف زي ده:

قاعد في أمان الله... سرحان في ملكوت الله (الله أعلم في ايه ولا في مين)
وفجأة..

هاركب الحنطور ... درجن درجن
واتحنطر... درجن درجن
(ماتخافش دي رنة اللي جنبك)

اللي جنبك: أيوة يا ابراهيم... جبت مراتك م المستشفى؟؟؟... هي كان عندها إيه؟؟.... لا حول ولا قوة إلا بالله.... يعني بهدلتكوا البهدلة دي ورحتوا بيها المستشفى في نص الليل وكان شوية تعب بسيط؟............ يلا الحمد لله.. قول لها تبطل سلبطة.......أيوة أنا وديت الورق بتاعي للمحامي يشوفه...... يا عم ما تخافش أنا في السليم......
طبعا تفضل تسمع في موال طويل عريض وعلى ما المكالمة تخلص تكون عرفت أصل وفصل صاحب التليفون

----------------------------------------------------------------------------
القاعدة الأولى : ما تبقاش مزعج
لما تتكلم في التليفون... خلى صوتك أوطى من العادي.. ما تخافش اللي معاك ع الخط هيسمعك كويس.. بس هترحم اللي حواليك من الدوشة
----------------------------------------------------------------------------

الظهر أذن.. وانت دخلت تصلي

الله أكبر
بسم الله الرحمن الرحبم
الحمد لله رب العالمين

كل الناس بيقولوا يا رب

الرحمن الرحيم

تهدينا وتحمينا يا رب

الحمد لله رب العالمين

ياااااااااا رب... ياااااااا رب
وبعدين في اللي سايب موبايله يهاتي ولا كأنه سامع ده... مش كان يعمله صامت عشان نعرف نصلي..

الرحمن الرحيم * مالك يوم الدين * إيـ..

مولاي صلي وسلم دائما أبدا على حبييييبك خير الخلق كلهم

إياك نعبد وإياك نستعين *

هو الحبيييييييييييب الذي ترجى شفاااااعته..
......
طبعا إنت مش عارف تصلي من الأوركسترا اللي شغالة جنبك دي... والاسم نغمات اسلامية
على فكرة اللي بيرن المرة دي بتاعك انت

----------------------------------------------------------------------------
القاعدة الثانية : عندك options كتير في الموبايل..ممكن تقفله.. تعمله صامت أو vibration
فرق بين أماكن تواجدك... لما تكون في مكان مش هتقدر تستقبل فيه المكالمات يبقى لازم تطفي الموبايل خالص.. أو على الأقل تعمله صامت.. وكده هتعرف مين اللي طلبك من غير ما تشوشر على اللي حواليك
زي في المحاضرات والاجتماعات... وأهم حاجة في الصلاة

ولو انت في مكان هادي، بس ممكن تستقبل مكالمات.. اعمله vibration .. بس اوعى تنسى القاعدة الأولى.. اتكلم بصوت منخفض
----------------------------------------------------------------------------

واقف مع صاحبك وبتتكلموا (الساعة 12:30)
فسخاني وباحب الرنجة....وبابيع واشتري في الرنجة
بصراحة أنا باكله كتير.... بيسلك المناخييييييييير
البصل البصل البصل
طبعا سيادتك هترد...

آلو أيوة يا تامر..... إنتوا فين دلوقت..... خلاص أنا هافوت عليكوا بالليل.... جبتوا الحاجة اللي هناخدها معانا............................................

(الساعة بقت 12:40)

لأ.. خلاص أنا هاعرفه........ بس ما تنساش تفهم هيثم ع الحوار م الأول.....................

(الساعة بقت 12:55)

----------------------------------------------------------------------------
القاعدة الثالثة : انجز
لما تكون مع حد.. ما تلطعوش جنبك ساعتين وانت بتتكلم في التليفون... استأذن من اللي معاك على الخط ولما تسيب الراجل اللي معاك ابقى كمل المكالمة براحتك

(على فكرة ممكن نحط هنا قاعدة كمان... وهي : ابقى اختار نغمة عدلة شوية)
----------------------------------------------------------------------------

أحيانا تبقى في المكتبة أو السينما (حسب إنت دماغك إيه)
وتلاقي واحد موبايله رن
هيفوت المكالمة؟؟؟ لأ طبعا... هيرد... ومش بعيد يفضل يتكلم عشر دقايق أو ربع ساعة... ومش بعيد كمان يكون بيتكلم على طريقة أخينا بتاع القاعدة الأولى
وانت تبص له مهما تبص له... ولا كأنه شايفك أو واخد باله منك

----------------------------------------------------------------------------
القاعدة الرابعة : بلاش تشتت اللي حواليك
لما تكون في مكان والناس اللي فيه مركزة مع حاجة معينة.. بلاش تشتتهم بمكالمتك.. يا ريت تخرج برة لحد ما تخلص...لأن على فكرة هم مش جايين المكان ده عشان يسمعوا حضرتك وانت بتتكلم في التليفون
----------------------------------------------------------------------------

ممكن تبقى راكب عربيتك وماشي عادي.. وتلاقي واحد ماشي في الطريق قدامك على أقل من مهله.. وتحاول تجيله من هنا ولا من هنا عشان تكمل طريقك .. ولا حياة لمن تنادي... عمال ييجي يمين وشمال..
ما تصدق تلاقي فرصة تقوم معدي منه
وطبعا ساعتها هتعرف السبب... البيه كان عنده مكالمة... وهو أساسا ماكانش شايفك وانت عايز تعدي منه... طبعا انت بتبص له بغيظ... وهو فاهم انت باصص له كده ليه... يقوم باصص لك بصة معناها "في حاجة يا كابتشن؟؟"

----------------------------------------------------------------------------
القاعدة الخامسة : بلاش تتكلم وانت سايق
صعب تقدر تركز مع السواقة والكلام في التليفون في وقت واحد.. خصوصا لما تكون بتتكلم في التليفون مباشرة من غير سماعة
إنت كده بتضايق اللي حواليك.. وممكن تؤذي نفسك لو فقدت السيطرة على عربيتك
يا ريت تركن على جنب لحد ما تخلص مكالمتك أو تستخدم سماعة سلكية أو لاسلكية بحيث تعرف تستخدم ايديك الاتنين بحرية