23.7.09

وسع من وش العقلاء

كان راجل طيب.. الله يرحمه
ملتزم ومتدين جدا –أحسبه على خير ولا أزكي على الله أحد- عمري ما شفته بيتخانق مع حد في مسألة دينية أيا كانت
كنت دايما ألاقيه موجه طاقته للخير

ومن ضمن الحاجات دي.. في مستشفى للأمراض العقلية في حلوان.. كان يجمع فلوس من معاه ومع كام واحد من جيرانه ويجيبولهم حاجات.. سواء هيستفيدوا بيها أو مجرد إنهم يسعدوهم بس
يعني يجيبولهم لبس.. أو يجهزولهم وجبات أكل ويودوها هناك

وفي مرة رحت معاه.. كان واخد أطباق صغيرة فيها حلويات شرقية
كانت أول مرة أتعامل مع ذوي الأمراض العقلية.. أو مع المجانين

طول عمري باشوف معمول عنهم حاجات في التليفزيون خصوصا في أفلام اسماعيل ياسين اللي دخل المستشفي دي "في الأفلام" أكتر من تلات أربع مرات

وطول عمري باضحك على الحاجات دي لكن مش مقتنع إن ممكن يحصل زيها أبدا
لحد ما جه اليوم ده...

-------

دخلنا ورحنا لعنبر ونادينا على المرضى اللي فيه عشان ياخدوا الأكل اللي الراجل ده جايبه
ووقفنا ووزعنا.. واحد منهم خد الطبق بتاعه، وقال له : وأنا كمان
ابتسم وقال له : ما هو الطبق بتاعك في إيدك آهو
رد : هو كل واحد طبق واحد بس؟
قال له : أيوة
راح سايبنا وداخل جوة.. وشوية وجه.. "وأنا كمان"
ابتسم وقال له : ما إنت خدت قبل كده
قال له :
لأ لسة ما خدتش
قال له : إذا كان الأكل لسة على شنبك آهو
راح ضاحك وسايبنا ودخل جوة

-----

واحد تاني خد الطبق وبعدين قال له : يا شيخ أنا عايز أسألك على حاجة
قال له : اتفضل
قال :
أنا كنت مدرس عربي .. واتجوزت واحدة.. وخلفنا ولد
وبعدين تعبت شوية كده، والدكاترة طلبوا مني تحاليل وحاجات.. بعدها قالولي إني مابخلفش..
طيب العيل ده جبته إزاي؟
ولما قلتلها راحت قايله لأهلها ورموني هنا.. يبقى الحل دلوقتي إيه؟

طبعا الراجل ما عرفش يقول له إيه غير: معلش .. وسيبك منها.. وانسى كل اللي حصل.. وحاجات من دي يعني

يا ترى الراجل ده كلامه صح؟
ولا هو حالته اللي صورتله القصة دي؟
ولا جزء صح وسببله الحالة دي عشان كده بقى في المكان ده؟!!

---------

رحنا عنبر تاني.. الممرض قال لنا نوزع من برة الباب الحديد
وإحنا بنوزع اتنين من اللي واقفين بدأوا يشدوا مع بعض.. المهم هديوا وقلنالهم نادوا باقي الناس اللي جوة.. فواحد منهم قال للتاني :
ادخل انده لهم
راح التاني مزعق :
طيب ما تدخل إنت.. إنت بتقول لي أنا ليه.. إزاي أدخل أنا.. وكمان إنت إزاي تكلمني كده؟
أنا لوا لكن إنت لسة عقيد.. يعني أنا اللي أقول لك وإنت تنفذ.. ادخل إنت ناديلهم


وفعلا دخل!!
----------

رحنا عنبر تالت..
العنبر كان مفتوح وقالولنا إن مفيش منهم خطر
والراجل بيوزع لقيت واحد استلمني..
أنا اسمى فلان الفلاني.. كنت باشتغل كذا كذا.. إنتوا جايبين إيه؟
وطبعا العبد لله مقلق من الراجل ده وعايز أخلع منه بأي شكل .. العمر مش بعزقة
قلت له : مفيش.. شوية حلويات كده ليكوا.. روح خد لك طبق
:S
بعدت شوية عنه .. جه ورايا يكمل كلام
على فكرة.. الناس اللي برة بيقولوا علينا إننا مجانين.. لا طبعا.. الناس اللي برة هم اللي مجانين.. لكن إحنا هنا العقلاااء.. إحنا عنبر العقلاااااااااااء
العبد لله : أكيد طبعا
بعدت عنه تاني.. جه ورايا
وعلى فكرة.. هنا أحسن بكتير من برة.. إنت عارف أنا هنا من امتى؟
من سنة تسعة وتمانين.. ورغم كده الراجل اللي جابني هنا مات وأنا لسة عايش
هو استفاد إيه بقى؟ ولا حاجة.. هو اللي مات.. وأنا، اللي هنا، عايش أهو ما جراليش حاجة..


--------
الحمد لله على نعمة العقل..
اللهم ديمها نعمة يا رب

هناك 3 تعليقات:

Ahmed Fayez يقول...

السلام عليكم
اسلام باشا
زعيم العقلاء
استمر

أميرة يقول...

آخر واحد ده عميق على فكرة :))

بس انت ليه كنت مقلق منهم ؟
انت كنت بتتصرف معاهم بحسّ الانسان العادي اللي بيقلق من المجانين في الشوارع .. بس هل لو تعاملت معاهم من منطلق إنك "دكتور" هتقلق برده ؟

بس الراجل بتاع التحاليل ده صعبان عليا :(
هو فعلا ممكن يكون اترمي في المستشفى دي ظلم .. و ساعات بتبقى حالة عدم الاتزان العقلي اللي عندهم متفاقمة لدرجة إنك تحس إنه عاقل جدا و بيقول كلام موزون :)

أنا بفكر بصوت عالي بس :))

غير معرف يقول...

أيوة فعلا كنت باتصرف معاهم بقلق أي إنسان
خصوصا إني كنت في سنة تانية تقريبا.. يعني ماليش أي احتكاك بالحالات دي

بس بالنسبة لمدرس العربي والراجل الأخير.. فالاتنين فعلا كلامهم هادي جدا وتحسي إنه موزون
لكن الله أعلم بيهم.. ما قدرتش أحكم خالص
إلا على ناس معينة زي الراجل اللي قال إنه "لواء" كان باين عليه فعلا إنه مريض

لكن فعلا الزيارات اللي زي دي.. بتعرف الواحد قد إيه في نعم كتير ممكن الواحد يبقى عارفها بس ما يحسش بيها إلا لما يشوفها ويتعامل معاها
ربنا يديمها علينا يا رب