في الراديو..
في الجـرايد..
في التليفزيون..
بقينا نلاقي صحفيين كتير، في برامج أو مقالات، كل واحد فيهم عمال يحلل ويفند في أحداث.. ويبدأ في سرد أدلة مقنعة (على الأقل مقنعة له هو) عشان يثبت إنه صاحب النظرة الأثقب.. اللي جابت "قرار" كل قضية بتحصل في مصر أو في العالم كله حتى
وفي ظل السماح الكبير (الشكلي غالبا) لكل واحد إنه يعبر عن رأيه، مهما اختلفت اتجاهاتهم السياسية
بقى عادي إنك تلاقي اتنين عروقهم نافرة وعمالين يزعقوا في بعض (في نفس الوقت)، دفاعا عن رأي في موضوع أو حل لمشكلة أو حق مهضوم لمواطن مظلوم (وهم كُثُر)
رغم إن دايما الحلقة بتخلص في الآخر بإن المذيع بيقفل الحلقة (عشان المخرج بيقول لي الوقت خلص)، والضيوف تقبض أجر الحلقة دي، والمشاهد يدخل ينام عشان يلحق الشغل بكرة (طبعا بعد مصمصة الشفايف على المشكلة.. ويمكن دعوة ولا اتنين على البعدا اللي كانوا السبب)
لكن لو دخلت قعدت على قهوة (قهوة بلدي.. مش كافيه).. أو تدخل دكانة راجل على قد حاله..
أو تتكلم مع واحد (ما تعرفوش) قعد جنبك في الميكروباص (بحميمية كأنكوا متربيين مع بعض في الحضانة)
تفاجأ بتحليلات سياسية قوية جدا.. أو تعليق على حاجة بتحصل في مصر.. وغالبا بتتقال في صورة نكتة
لكن غالبا..
بتبقى قوية ومظبوطة
مثلا..
دخلت عند ترزي.. لقيته بيتكلم مع واحد قاعد معاه :
- اتصلت بالراجل اللي هياخد منك مكنة الخياطة؟
- لا والله باكلمه ما بيردش.. ورحتله البيت بس ما عرفتش هو أنهي بيت بالظبط
- طيب وهو كان دافع لك عربون؟
- ما هي دي المشكلة.. اداني خمسين جنيه، والمكنة اتعلقت على كده.. لا هو بييجي ياخدها ولا أنا عارف أبيعها رغم إن في ناس كتير عايزين يشتروها
- يا عم سيبك منه ما دام هو مطنش كده
- ما أنا خايف بقى ييجي يسأل عليها ويركبني الغلط ويعمل لي قعدة عرب.. وطبعا هيجيبوا الحق عليا لأنه دافع عربون
سكت شوية كده وبعدين قال:
- مع إنهم يعني لو بيفهموا.. يبقى مافيش مشاكل
لأن المفروض قعدة العرب دي ما تجيبش حق حد
استغربت وقلت له:
- إزاي بقى؟ دي قعدة العرب دي حكمها لازم يتنفذ
ضحك وقال لي:
- ما أنا باقول لك لو بيفهموا.. هو في عربي أساسا واخد حقه؟
شاورلي كده على عربي واخد حقه عشان يقولولي حق عرب
ضحكنا.. ولقيت عنده حق
هم صحيح ليه سموها قعدة عرب وحق عرب وكل واحد ياخد حقه.. مع إن العرب كلهم مش واخدين حقوقهم سواء من اللي حاكمينهم أو من الغرب (بفتح العين أو ضمها)؟
لو تعرف حد واخد حقه.. ابقى شاور لي عليه
هناك تعليقان (2):
قعدة العرب ده تطبيق للعرف. مش المقصود بيها العرب ككل، و إنما العرب البدو.
و لحد دلوقتي قعدات العرب بتتم.
كنت اتفرجت على برنامج بيتكلم عن المحاكم القبلية العرفية اللي لسة موجودة لحد دلوقتي في بدو سينا.
في أغلب المشاكل، بييجي الخصمين و تفصل بينهم المحكمة اللي هي قعدة عرب فيها كبارات القبيلة أو القرية.
إنما قعدات العرب المودرن اللي بتتم في جامعة الدول العربية، اعتبرها فرصة لتناول الطعام.
برامج التليفزيون دي هراء يناقشه مجموعة من أهل الهراء و يستمع له محبّي الهراء.
:)
يا وينر ما قعدة العرب دي معروفة
وممكن يتحكم فيها بإن واحد يرجع للتاني حقه لو كان حق مادي
أو يديله بديل لحقه لو كان معنوي
وأنا سمعت مرة عن واحد اعتدى على واحد موظف عشان يخوفه من حاجة معينة
فعملوا قعدة عرب وحكموا عليه "بفرش حشيش" قصاد اللي هو عمله في الراجل ده
:)))
لكن الغريب هوالربط اللي الراجل عمله في ثانية ما بين الكلمتين
وراح رامي الكلمة في مكانها مظبوط خلاك تبص في ناحية تانية خالص
لكن هي يمكن حاليا مقصود بيها العرب "البدو" بس، لأنهم (شوية) ملتزمين بشوية من عادات العرب بتوع زمان "ككل"
ومنها الحكاية دي.. إن الكبار لما يحكموا حكم.. لازم يتنفذ، وإلا تبقى مشكلة كبيرة في حق اللي يرفض الحكم
إرسال تعليق