من الدانمارك لإقبال للعلمانية للبنا.. يا قلبي لا تحزن

كلنا سمعنا عن موضوع الرسومات المسيئة للرسول
وكلنا اتضايقنا.. وزعلنا.. وكالعادة قعدنا ندعي عليهم.. ونقول أحفاد القردة والخنازير
وكالعادة برضه.. طلعت إشاعة بإن الراجل اللي رسم الرسول مات محروق
"نفس الإشاعة اللي طلعت المرة اللي فاتت.. تقريبا بيموت محروق كل ما الصور تتنشر"
المشكلة بقى إن اللي رسم الكاريكاتير كذا واحد.. مش واحد بس

المهم..

الناس هاجت وثارت (وده من حقهم) لكن مفيش واحد .. بص للكاريكاتيرات دي وقال اللي رسمها بالشكل ده .. رسمها كده ليه؟

سؤال بسيط جدا
وإجابته أبسط منه.. إن هو ده اللي شايفينه في المسلمين..

وإن أول ما يذكر كلمة مسلم قدام أي حد فيهم يفتكر أسامة بن لادن أو الظواهري.. وفي أحسن الحالات يفتكر صدام حسين
فطبيعي.. وطبيعي جدا كمان إنهم يفترضوا إن اللي بيشوفوه من المسلمين دول جاي من دينهم اللي هم متمسكين بيه
وطبيعي جدا إنهم يفترضوا إن النبي -صلى الله عليه وسلم- هو اللي علم المسلمين كده (حاشا لله)

وده لأن مفيش تقريبا أي صورة عدلة منتشرة بشكل واسع للمسلمين إلا في نطاقات ضيقة جدا

طيب إحنا إتضايقنا إن الناس دي مش فاهمين الإسلام صح رغم إنهم مش مسلمين.. ومش عايشين مع المسلمين

نيجي بقى في الناحية التانية
نلاقي إن عندنا مسلمين.. مولودين مسلمين.. وعايشين بين المسلمين..لكن آرائهم زي الـ.....
ما علينا

وزي ما المثل بيقول.. خبطتين في الراس توجع... لكن امبارح اتخبطت تلات خبطات ورا بعض..

---------------------

الخبطة الأولى...
من الحاجة إقبال بركة، زعلانة قوي قوي من أبو تريكة..
ليه يا ستي؟ ..

أصله الوحش قليل الأدب ده.. لما عملوا احتفال تكريم .. وجابوا نانسي عجرم سابها ومشي.. ولما عملوا احتفال في دبي وجابوا سعد الصغنطط .. برضه سابه ومشي
يسيبهم ليه يعني؟؟ كل ده عشان يلفت إنتباه الناس ليه (!!!!!!!!)
عيب عليه إنه يسيب الناس في الاحتفال كده... اللي بيعمله ده هو اللي بيصرف الناس عن الفن الراقي وبيفتح المجال للفن الهابط (!!!!!!!!!!)

أولا .. هو أبو تريكة محتاج يلفت نظر حد؟؟ ده بسم الله ما شاء الله الناس بتموت فيه في كل حتة في العالم العربي
ثانيا..اشمعنى اللي بيروح حفلات وديسكوهات ويرقص مع دي ومع دي.. بنقول دي حرية شخصية..
ولما نلاقي واحد مش بيحب يسمع أغاني أو يحضر حفلات رقص وكلام فاضي من ده.. يبقى وحش وقليل الذوق؟؟
هو مش من حقه يبقاله حرية شخصية هو كمان
ثالثا.. بقى سعد الصغير، ونانسي هم الفن الراقي؟؟

عموما مش غريب عليها..
لأنها قبل كده كانت زعلانة جدا لأن زمان كانوا بيلبسوا ميني جيب وكان الموضوع إيزي يا عزيزي.. لكن دلوقتي الناس بقت متزمتة ورجعية

مش واخدين بالهم إن الحجاب ده مجرد نصيحة من الخالق للستات.. عايزين ياخدوا بيها ماشي مش عايزين خلاص

(آه والله العظيم هي قالت كده)

---------------------

الخبطة التانية بقى من واحد علماني..
زعلان هو كمان ...
ليه يا أستاذنا؟

أصل تدريس الدين في المدارس ده هو سبب التطرف اللي بنشوفه اليومين دول.. وهو اللي بيمنع العقل من التفكير والتجديد والابتكار
لازم نلغي تدريس الدين.. وكفاية نحط مادة عن الأخلاق والقيم..
لأن الدين المفروض إنه ما يتفرضش على حد بالعافية (!!!!!!!!!!!)

اللي أعرفه إن التطرف هو المغالاة في الدين..
إني باعمل حاجات زيادة قوي عن اللي أمرنا بيها الدين.
وعشان أعرف الدين أمرني بإيه أظن كده إني لازم أدرس دين..

طيب لما آجي أدرس أخلاق.. هاجيبها منين؟
ومين اللي هيقول إذا كان التصرف الفلاني من الأخلاق ولا لأ؟
أجيب واحد دكتور علم اجتماع وأسأله؟ ولا آخد حاجات ربنا هو اللي قال لنا عليها؟؟
مين هيبقى أصح يا ترى؟

الغريب إنه قال إن الدين بيتفرض بالعافية على الطلبة..
كن ما زعلش إن الرسم مفروض عليا بالعافية وأنا يمكن مش باعرف أرسم أساسا..
ما قالش إن الإنجليزي مفروض عليا وأنا يمكن مش عايز أسافر برة..
ما قالش إنهم بيفرضوا علينا نصوص عقيمة في العربي بدون أي فايدة

كل ده مش مهم.. المهم الدين نلغيه

---------------------

الخبطة التالتة
جينا بقى للزغلول الكبير قوي..

بعد ما قمت من قدام الأخ اللي مش عايز نفرض عليه الدين.. دخلت على موقع مصراوي.. ولقيت مولانا الشيخ جمال البنا.. بيدينا فتوى جديدة عشان الحياة تبقى في الإيزي موزو

إيه يا سيدنا ؟ بتقول إيه؟

باقول إن من حق الشباب والفتيات تبادل القبل.. حاجة يعني تصبيرة كده.. أصلهم يا عيني غلابة مش عارفين يتجوزوا..

طيب والذنوب يا مولانا؟

مش مشكلة أصل القبل دي من صغائر الذنوب... يعني شوية حسنات كده تمسحها.. مش مشكلة يعني(!!!!!)

قصد حضرة سعادة سيادتك زي موضوع السجاير في رمضان كده ؟؟

أيوة.. بالظبط.. المدخن بالنهار في رمضان ممكن دماغه تبقى مش مظبوطة.. وإنتوا بتقولوا إن التدخين بيفطر.. فكده هو ممكن يضطر يدخن ويبقى فطر..
فإحنا ممكن نسمح له يدخن سجارتين تلاتة .. بدل ما يفطر (!!!!!)

غريبة قوي حكاية القبل دي..
أمال الرسول قال إن اللي مش عارف يتجوز يصوم ليه؟ ما قالش على القبل ليه ساعتها؟ ولا الحديث ده ما مرش على سيادتك؟
طيب لو عندك بنت.. ترضى إنها يتطبق عليها الفتوى دي ولا إيه؟؟


بالنسبة بقى لموضوع السجاير.. كويس إنك نبهتنا
زي ما من حق المدخن يشرب سجارتين بس بدل ما يشرب كتير ويبقى فطر
أنا برضه باعطش في رمضان..
ينفع أشرب كوبايتين مية بس بدل ما أشرب كتير وأبقى فطرت؟؟