وأنا قاعد قدام تليفزيون بيتنا العامر.. عمال أتنقل برشاقة أحسد عليها "رشاقة في أصبعي السبابة فقط" بين القنوات اللي بقت أكتر من الرز في الكشري
لقيت الدنيا كلها مقلوبة..
كل القنوات بتتكلم عن أزمة النقاب.. الله؟ وهو النقاب عامل أزمة؟
العاشرة مساءً.. الحياة اليوم.. ساعة ونص.. قصدي تسعين دقيقة ولا ما أعرف إيه
كل القنوات.. طيب إيه الحكاية يا أخوانا؟
فضيلة شيخ الأزهر قال إن النقاب مش فرض.. مش فرض.. مش فرضطيب وإيه الجديد؟وأتاري الحكاية إنه بعد ما زعق لبنت صغيرة عشان لابسة نقاب.. ووضح لها إنه بيفهم أكتر منها ومن أهلها أجمعين، وأجبرها إنها تقلعه
ما في ناس تانية كتير قالوا الكلام ده.. اشمعنى جيتوا عنده ووقفتوا؟
أُصدر قرار بمنع النقاب في الأزهر.. لأ.. وبمصادفة عجيبة جدا .. اتمنع النقاب في المدن الجامعية كمان في نفس الوقت بدون سابق اتفاق
فضلت طول الأسبوعين اللي بعد كده .. في كل مكان أسمع محور الحديث، عن النقاب.. وبين اللي قال إنه فرض بإجماع الأئمة الأربعة.. وبين اللي قال إن الأئمة الأربعة ما اتفقوش عليه (الله أعلم بقى.. واضح إن في عدة أئمة أربعة)..
ورغم كده الراجل ثبت على موقفه ضد المظاهر الدخيلة على تعاليم الإسلام كالنقاب
بعدها أسمع واحدة منتقبة بتشتكي لزميلتها.. بعد ما منعوها من المدينة الجامعية.. فضلت أسبوع دايخة على مكان تسكن فيه مع بنات كويسين
وفي الآخر.. لقت مكان كده في منطقة غريبة.. ومش عارفة تعمل إيه؟ تقعد مع البنات دول في المكان ده ولا لأ..
طيب مش كانوا يسيبوها الغلبانة دي في مكان مضمون بدل الشحططة اللي هي فيها دي
المهم..
في يوم تاني وأنا قاعد نفس القعدة قدام نفس التليفزيون "حيث ازدادت عضلات أصبع السبابة قوة.. بينما اضمحلت باقي عضلات جسمي"
والاقيلكوا خير اللهم اجعله خير..
كأن في مكان واااااااااسع.. والناس كتييييييييير...
وخير يا رب كده ألاقي المكان ده كله أحمر في أحمر..
وقال إيه؟
الناس كلها عريانة.. ومكتوب مباشر
أنا قلت هو في إيه؟
هي القيامة قامت خلاص، وبينقلوها نقل مباشر ولا إيه؟
لأ لأ.. ده نص الحاضرين بس اللي مش لابسين.. والنص التاني مستور بلبس أسود في أسود..
ربنا يستر.. أنا سمعت إن الأسود في النقل المباشر مش خير
بدأت أشوف الحكاية.. لقيته مهرجان القاهرة السنيمائي
الله؟ طيب وليه الرجالة كلهم لابسين حشمة ومحترم.. ومش باين منهم غير الوجه والكفين؟
في الوقت اللي الستات كلها عندها عجز حاد في الهدوم
هي دي حالة وبائية جديدة هيسموها "Acute clothes deficiency" ولا إيه..
ما قدرتش أبداً أعرف السبب في الوضع المقلوب ده
الغريب إن أنا لو غلطت وخرجت بنص كم كده ورجعت بالليل.. بارجع باتكتك م البرد.. هم دول إيه؟
ما بيبردوش؟
ولا بياخدوا حقن ضد البرد ولا إيه؟
الأغرب إني لقيت كل ما واحدة تطلع المسرح.. عزت أبو عوف والسيد وزير الثقافة يستقبلوهم بالقبلات على الخدين
لكن كل ما راجل يطلع.. يسلموا عليه من بعيد لبعيد..
داهية لا يكون أنفلونزا الخنازير تحور وبقى رجالي بس؟ استر علينا يا رب
تاني يوم صحيت على الجرايد كلها مقلوبة
وقريت عن التصريحات اللي أطلقها شيخ الأزهر منتقدا مهرجان القاهرة
واللي فيه من عري وقلة حيا.. خصوصا موضوع البوس ده..
اللي هو حرام حرام حرام "حسب قوله"
ولقيت القنوات كلها ما بقالهاش سيرة غير الكلام ده
وكل مثقفين البلد وقفوا في وشه وقفة رجل واحد.. دفاعا عن الحرية.. والديمقراطية.. والحق الدستوري لكل مواطن في القلع.. وحفاظا على أحدث ما توصلت إليه البشرية من خطوط الموضة الحديثة
لكن بصراحة الراجل عمل اللي عليه وثبت على موقفه.. ولم يهتز..
ولم يفاوض على رأيه.. ووقف نفس الوقفة الثابته في وجه النقاب الدخيل على الإسلام
ووقف ضد هذه الأعاصير العاتية.. مناضلا وحده..
صحيت من النوم تاني.. "أو بمعنى أصح.. أولاني"
لأجد أن كل هذا ما هو إلا أضغاث أحلام.. حيث أن العشا كان تقيل حبتين..
وإن النقاب ما زال ممنوع منعا باتا.. كمنع السجائر في غرف العمليات
لكن المهرجان شغال وميت فل وأربعتاشر
ولما سألت عن سبب منع النقاب.. وعدم التعرض لمهرجان القاهرة بأي سوء..
اكتشفت أن النقاب.. خطر على الأمن العام.. وناقل للعدوى والفيروسات.. وسبب مباشر في عمليات السرقة والنصب.. وطريقة خفية لأعمال مشينة يندى لها الجبين
أما الـacute clothes deficiency فهو غير خطير على الإطلاق..
حيث أن النساء لا يشعرن بالبرد..
22.4.10
النساء لا يشعرن بالبرد
الاشتراك في:
تعليقات الرسالة (Atom)
هناك 6 تعليقات:
ربنا يستر على ولايانا.
الأحوال مابقتش تسر حد يا إسلام.
الوضع بقى محزن جداً و يجيب كل الأمراض المزمنة.
ارحمنا يا رب.
عندك حق والله يا وينر
أنا زي ما قلت..
عن نفسي مش واخد بالرأي الفقهي اللي قال إن النقاب فرض.. مع احترامي له طبعا
لكن في حاجات كتير أولى بالمنع من النقاب
مقالك فكرني بجروب كنت شفته عالفيس بوك اسمه "احترمي نفسك و أنا مش هعاكسك" ... !!!!!!!!!!!!
حقيقي قمة الاستفزاز .. المفروض كانوا يعملوا جروب مضاد و يسموه " ولو محترمتش نفسي هتعملي إيه ؟ " ... خلاص بقى كل همنا نغطي البنات اللي ماشية في الشارع عشان كل مشاكلنا تتحل !! .. خلاص بقت البنت هي سبب أزمة البطالة و الجهل و التفاهة و عدم الوعي السياسي و ضيق الأفق و و و ... حملوها وزر المجتمع كله .. و لو حد عاكسها يقولك " أصلها مش محترمة نفسها" !! يا سلام !!!!! .. و هو ربنا أصلا أمرك بغض البصر ليه ؟ عشان أكيييد فيه حاجات ممكن تشوفها في طريقك تقوم تغض بصرك .. مش تقعد تبحلق و تدي لنفسك العذر و تقول أصلها هي اللي مش محترمة !!!
بقت كل مشكلتنا منقبة و لاّ لأ .. الرحمة من عندك يارب ..
كده تبقى ما خدتيش بالك أنا أقصد إيه من الكلام ده
ولو تقري ردي اللي قبلك على طول هتلاقيني باقول إني مش واخد بالرأي اللي بيقول إن النقاب فرض
والحمد لله.. تحترم نفسها ولا ما تحترمش نفسها أنا ما باعاكسش حد
لكن أنا اللي غايظني حالة الاحتفاء الكامل باللي قالعين وعايشين حياتهم بالطول والعرض
وفي المقابل.. يهتم جدا شيخ الأزهر بإنه يثبت إن النقاب مش فرض
طيب أنهي أولى بإنه يعمل مشكلة عشانه؟
إننا نعمل مشكلة مع طفلة منتقبة؟
ولا المشكلة دي تبقى مع اللي فاكرين نفسهم ع البحر؟
بلاش..
دي حرية شخصية إنهم يقلعوا
طيب بنفس المنطق.. مش هي هي نفس الحرية الشخصية إنها تلبس النقاب؟
بلاش..
ليه تسمح للبنت تدخل الكلية شبه عارية
وفي نفس الوقت تهتم بإصدار قرار لمنع إنها تدخل بنقاب؟
بلاش..
حتى في السكن الجامعي فرقت بينهم
ووقفت قدام النقاب.. مع إنك كده هتخليها تتبهدل أكتر برة
مشكلتي الأساسية مش إني أثبت إن النقاب فرض ولا لأ
مشكلتي الأساسية هي الكيل بمكيالين
يعني لو اعتبرنا المنتقبة متطرفة ولازم نقف لها
يبقى من الأولى إننا كمان نعتبر الكاسيات العاريات دول متطرفات ونقف لهم
السؤال اللي أنا عارف إنه هيظهر دلوقتي..
اشمعنى البنات يعني؟
الولاد هم الملايكة اللي ما بيغلطوش؟
طبعا لأ..
ولازم أي غلط من ناحية الولاد نقف له
بس هو الموضوع كان رايح في وجهة معينة.. ما تنفيش إن في مشاكل تانية
:)
على فكرة و الله إنت اللي فهمتني غلط :))
أنا كان قصدي إني أسخر من الوضع كله .. مكنتش بهاجمك و لا أي حاجة ..أنا بسخر من إن الناس في التلفزيون شاغلة نفسها ببعضها زيادة عن اللزوم .. و طبعا أنا ضد إن حد يفرض علي أي انسان يلبس ايه فين .. دي حرية شخصية كاملة ..
و اللي بيحصل و اللي انت قلته أنا متفقة معاك فيه ..
و كله شكل من أشكال التناقض ..
و بلاش تفهمني غلط تاني :))
حاضر.. مش هافهمك غلط تاني
:))
أنا بس حبيت أوضح إن مشكلتي مش منقبة ولا لأ
:)
إرسال تعليق